Теміржолшылар жанұясы ұлттық байқауда «Дарынды отбасы» номинациясын жеңді

Астанада өткен «Мерейлі отбасы» ұлттық байқауының қалалық кезеңінде үздік деп танылған 19 отбасының қатарында теміржолшы Жұмашевтар отбасы да бар. Олар «Дарынды отбасы» номинациясының жеңімпазы атанды!

Ләззат Жұмашева – «ҚТЖ» ҰК» АҚ еншілес ұйымы «Қазтеміртранс» АҚ-да табысты қызмет ететін тәжірибелі теміржолшы, бес баланың анасы. Жолдасы Арнұр – заңгер, жеке кәсіпкер. Жұбайлар 18 жыл бойы бір шаңырақ астында береке мен бірлікті, отбасылық құндылықтарды насихаттап келеді.

Балалары – Ақсұлтан, Алдияр, Амина, Амира және Алимхан – білім мен өнерде, театр мен қоғамдық істерде белсенді, түрлі байқаулардың жеңімпаздары.

Соңғы жылдары отбасылық дәстүрге айналған іс – балалармен бірге бақша егу. Ал биыл тұңғыш рет отбасылық тимбилдинг өткізуді жоспарлап отыр.